.
.
Archie’s Archives voorsien ouers wie se babas in die NISE (intensiewe sorg vir babas) opgeneem is, van ’n pak kinderboeke. Tiffini Hein, medestigter van Archie’s Archives, verduidelik dat die inisiatief gebore is uit haar en haar man, Richard, se ervaring met hul babaseuntjie, Archie.
Hy het gely aan neonatale Marfansindroom, ’n seldsame toestand wat binne maande tot sy sterfte gelei het. “Ons was in die greep van hartseer toe Richard gesê het genoeg is genoeg – ons kon nie toelaat dat Archie se ervaring van die wêreld twee hartseer mense in ’n hospitaal is nie. Ons begin toe vir hom lees. Danksy boeke kon ons ons eie klein wêreld daar in die NISE betree en dit het enorme vertroosting verskaf.
Dit was ’n wonderlike bindingservaring en het ons aandag van al die stresfaktore om ons afgelei,” vertel sy. “Navorsing wys dat die geluid van ’n ouer se stem baie gerusstellend vir ’n baba is en ook enorme kognitiewe voordele inhou,” sê Verena Bolton, neonatale verpleegster en nasionale koördineerder van Netcare se Ncelisa-melkbank.
