Vandag se kinders is slagoffers van oorweldigende stres wat spruit uit ’n omgewing wat voortdurend verander, waar die pas aanhou versnel en waar ál groter eise aan hulle gestel word. Die samelewing word ál meer prestasiegedrewe en mededingend. Ouers weet dit – dis immers die wêreld waarin ons elke dag ons brood verdien. Ons is besig besig besig. Geen wonder ons is so dikwels angstig of moeg nie.
Om ons kinders se onthalwe moet ons egter ons eie stresvlak onder beheer kry en daadwerklike stappe doen om hulle ook teen stres te beskerm.
Jou kind se brein is nog aan die ontwikkel. Emosioneel en intellektueel kan hy nie naastenby die dinge hanteer wat ’n grootmens hanteer nie, en dikwels voel ’n kind ook magteloos om hokaai te roep.