.
.
Jou nuwe babatjie word nie juis vuil nie en hoef nie elke dag gebad te word nie. Louwarm water en ’n sagte waslap is in die eerste week of wat genoeg. Maak seker jy was jou baba se nekkie goed omdat melk neig om in die vetrolletjies saam te pak (nou weet jy waar om te gaan soek as jy iets suurs ruik).
Druk haar lyfie eerder met ’n handdoek droog pleks daarvan om te vryf. As ekstra bederf kan jy die handdoek op koue winteraande vooraf vinnig in die tuimeldroër warm maak.
Dit verwys na die wit, skilferagtige kors wat soms bo-op die kopvelletjie vorm. Dis eintlik niks om jou oor te bekommer nie. Smeer ’n paar druppels olyfolie aan en kam die skilfers sagkens met ’n bababorseltjie uit. Melkkors verdwyn gewoonlik gou, maar klop liewer by die pediater aan as dit na die gesiggie of nek versprei.
