Kinders van vyf wat eetversteurings het? Ja, sê navorsers aan die Universiteitskollege van Londen se instituut van kindergesondheid, wat ’n studie onder kinders tussen vyf en 13 jaar oud gedoen het. Hulle het bevind dat drie uit elke 100 000 kinders eetversteurings het.
Daarby berig die Britse Daily Mail-koerant dat kinders van so jonk as drie al vir eetversteurings behandel is. Skokkend! sal baie sê, maar is dit regtig so skokkend in ’n wêreld wat plankdun modelle aanbid, vroue nog slanker en jonger op glansvoorblaaie laat lyk, duisende dieetprodukte op die mark aanvaar en kompetisies vir meisietjies hou waar hulle soos prikkelpoppies lyk?
Daarom is dit so belangrik dat jy vir jou kinders van kleins af die regte positiewe boodskappe oor hul voorkoms gee, sê kenners. ’n Deel van daardie boodskappe het te doen met hoe jy jou eie lyf beskou en hoe jy self oor kos, jou lyf en gesondheid in die huis praat, selfs dit wat jy as mooi beskou en beskryf. Jou kind neem immers alles in wat jy sê, selfs al dink jy sy luister nie.